2025/07/23(三)~2025/07/25(五)
今日工作事項
執行小主播上場第一梯次个營隊
擔任開幕式个主持同紹介自家
𢯭手帶隊員去 B 棟个攝影棚、主控室、道具器材室、C 棟个二樓、三樓參訪
翕相記錄活動个情形
𢯭手隊輔來帶小隊个隊員
做活動組大部分个設備準備還有麥克風安排
帶等各小隊个隊員去搞一隻新聞个桌遊
逐日營隊結束後，𢯭手準備相關个環境安排
今日工作心得
第一日，𠊎打早就跋䟘起來，因爭係營隊个頭一日，做毋得慢分，到公司之後發現朝晨个辦公室正經無麼个人，電火大體都還吂扚起來，歸間就暗暗仔恁仔。到後來，𠊎去主持了開幕式還有跈等艾粄阿姐去帶參訪，試著都比𠊎自家想像个還較順序，大體都無堵著麼个問題，應該愛紹介个東西都有紹介著。到了暗晡夜个時節，𠊎又去大禾埕該片𢯭手客家廚房个零星事務，對𠊎來講正經係當特別个經驗，毋係逐日都有恁樣个機會做得企著第一排去看韓國規模个節目拍攝。到後來甚至還跈等去了佢等慶功个餐廳，當近去看著了當多藝人。雖然歸日做事做下來當悿，毋過𠊎還係試著有佢个價值。
第二日，𠊎有兜仔慢到，因為前一日暗晡忒𤸁了，身體有兜仔懶尸。今晡日跈等佢兜學員上了當多个課程，毋過對𠊎來講就係準備各種需要个設備還有臨場反應，算係有了解著一隻課程愛順序進行需要仰般來安排。今晡日較悿个有一點就係，細人仔到今晡日變到還過吵了，歸間教室鬧熱煎煎，比市場還較吵鬧，正經分𠊎佇毋著。
第三日，朝晨𠊎兜就開始了畫妝个課程，對𠊎來講係盡生趣个體驗，因爭𠊎係平常時毋會畫妝，乜毋知愛仰般畫妝个人，故所全部對𠊎來講都算係新个知識領域，乜分𠊎理解了畫妝品个市場仰會有辦法做到恁大恁多樣。到了下晝就係𠊎愛帶大家來搞桌遊，本旦恅著室內坐等毋會當𤸁，毋過結果就係聲音用到無伸幾多，下二擺需要請佢兜學員來𢯭手讀了，無𠊎乜無結煞。
請先 登入 以發表留言。